لماذا خلدت قصص الحب ؟

• جلست مع صديقى على شاطئ النيل وهو يعانى من ضغوط الحياة الزوجية واخذت اقول له أن القمر بدرا فتذكر ايام خطوبتكم وكيف كنت ترسل إلرسائل إلى القمر ؟! اخذ يسألنى وكيف يحدث هذا قلت له أنه زمان قبل التليفون والموبايل والرسائل لم يكن يجد المحبين الاوائل سوى أن ينظروا للقمر فى نفس الوقت الذى يحددوا فى مواعيدهم المخطوفة من العزال حتى ينظروا إليه فى نفس الوقت فبالتالى يعرف كل منهم انه ينظر إلى القمر فى هذه اللحظة فيحدث لديهم ارتواء عاطفى .. نظر إلى كأننى كائن قادم من الفضاء الخارجى وقال لى أنه فى فترة الخطوبة كل شعوره كان ببساطة انها امام زجاجة مياه ساقعة وانت حران فكل هدفه هو نيل  تلك الزجاجة المشبرة ليس إلا.. ثم نظر لى حاليا وقال تعرف لو قيس قابل ليلى اليومين دول بعد جمعيات المرأة المتوحشة اللى بتغذى الستات ازاى يكونوا رجالة وقالها شايفة القمر ياليلى حترد عليه بكل بساطة وتقولوا انت شايفنى عامية يا ابن العامية ده طبعا لو ليلى كانت بنت ناس لكن ممكن بقى تسبله الملة والدين علشان تثبتله انها قد ايه رومانسية بالزمن الحالى !
• وعلى نفس المنوال  لو كان روميو تزوج جوليت لم نكن لنسمع بهم ولو كنا سمعنا عنهم اى حاجة  كانت أن جولييت خانت روميو او العكس وعلى العموم لو تفكر فى القصة التانية اللى بين قيس ولبنى برضه لو كانوا اتجوزوا كان زمان لبنى رافعه عليه قضية خلع ومبهدلاه فى المحاكم بنفقة العيال تقولى حب.
• طب يا سيدى ايه رأ يك أن الست اللى الراجل تنازل عن العرش خانته بعد ما تنازل عن العرش ، قلت له حاسب ده خوض فى الاعراض وبعدين دى كلها شائعات.
• رد على صاغرا يعنى حبهم ده اللى حقيقى ... انت فى الزواج عامل زى ذكر النحل بس الفرق بينك وبينه أن فى عالم الحيوانات الستات ارحم يعنى ذكر النحل بيموت بعد التلقيح ذكر العنكبوت النونو الحبيب كذلك العنكبوتة بتاكله لكن انت فى الزواج الانسانى الست بتستفيد من التلقيح انها تكون أم وخلاص هى اصبحت كائن تانى لا هو ست ولا هو راجل اصبحت أم ودورك انت تصرف على الأم والعيلة وتاخذ الزبالة معاك وانت نازل يعنى ببساطة كده انت قبل الزواج كنت بتحب الجبنة الرومى فقررت انك تجيب مرات البقال وولادها يقعدوا عندك وفى النهاية الجبنة الرومى بتخلص بعد اول يومين زواج ، يعنى كده روميو وجوليت وقيس وليلى او حتى قيس ولبنى اتخلدت قصص حبهم علشان قيس ماخدش الزبالة معاه وهو نازل ولا قعد يضرب اخماس ف اسداس علشان يجيب ثمن البامبرز وبعد ده كله لما بتكتشف ان مرات البقال معاك فى البيت هى وولدها تلاقيها بتقولك انت ليه موش بتجبلى ورد بذمتك فى حد يجيب ورد لمرات البقال؟!.