Wednesday, February 15, 2017

منطق المهلبية


  • قد تجتهد كثيرا وتحاول ان تشرح وجهة نظرك وتتصور أن تحوليك لها للصيغة الرياضية سيسهل لك الاموروتقف امامها حائرا تحاول ان تبسط وتعيدها الى سنواتها الاولى فى الدراسة وتقول لها أن واحد + واحد بيساوى اتنين سوف تنظر لك بكل عمق كأنها غلبت تسلا واديسون معا وتقول حط واحد جنب واحد يبقوا احداشر او حط واحد مايل منهم يبقوا اتنين او ستة اختار انت بقى وبالطبع لو كان اديسون او تسلا عايشين كانوا انتحروا معاك ويمكن يكون معاكم كلكم ادلر بتاع التفاضل فوق البيعة.
  • لكن الصراحة ان الغلط فيك وفينا احنا الرجالة بشكل عام لأن المسألة ابسط مما تتصور فقواعد المنطق النسائية مختلفة تماما عن قواعد المنطق الطبيعية لدى الستات منطق مختلف وطريقة تفكير يصعب التنبؤ بها لكن اختصر صلاح جاهين على لسان سعاد حسنى فى تمثيلية هو وهى ذلك المنطق المهلبى الغير عادى بالاغنية الشهيرة
  • بتحبنى
  • ايوه
  • متحبنيش بالشكل ده
  • مبحبكيش بالشكل ده
  • اهوه قالى موش بيحبنى يا ناس يخلصكم كده
  • اصدقائى الاعزاء ضع هذه الاغنية كانشودة فى دماغك حينما تحاور اى سيدة وتعجز عن اقناعها او حينما تعجز عن فهم  كيف انها طلبت فستان وحينما ذهبتوا للاختيار تركت الفستان وعجبتها الشنطة لكنها فى النهاية اشترت الجزمة اللى طول عمرها انت عارف انها مبتحبش اللون ده ، لكنك لو فكرت وحاولت تعيد لها الذاكرة سوف تنظر لك بعمق اكثر وتقول لك بكل ثقة بس خد بالك دى حتليق جدا علي ! وربما عشت طوال عمرك تسمع انشودة تلك الجزمة وتتمنى أن لم تكن تعترض حيث سوف تسمع مين قال عن الجزمة حتى تتمنى أنك لو كنت حطيت جزمة فى بقك وسكت يومها كان زمانك مرتاح من كل الهرى ده.
  • ركز جيدا انظر إلى المهلبية وكيف تهتز امامك ولا تستطيع ان تأكلها الإ بمهارة خاصة وسوف تسقط من المعلقة هذا هو حقيقة المنطق النسائى.
  • ليس عليك ان تقرأ الرجل من المريخ والمرأة من الزهرة انت ولا هى لست من أى كوكب آخر المهلبية هى السبب العملية اكثر اختصارا
  • تحفظ الاغنية فى دماغك تستمتع بأكل المهلبية بعمق مهما كانت الملهلبية  دى غير طعم المهلبية اللى ولدتك متعودة عليها لأن دى طريقة خاصة هى عملاها بيها محدش يعرفها من ايام صلطح باشا الكبير تريح دماغك وتنعم بالسلام الداخلى ! وتعيش بالمنطق الطبيعى مع اى حاجة تانية فى الحياة غير الستات !
  • هى دايما صح زى اللوحة اللى فوق دى بتمثل منطق المهلبية (المهلبية لوجيك)!
Post a Comment