تنويعات بطاطسية

• اذا كنت تكلمت عن الابداع الإلهى فى حبة القمح فلا يمكن أن ننسى البطاطس كنعمة الهية كبرى على الانسانية كلها ربما البطاطس ليس  لها اشكال كثيرة مثل القمح لكن البطاطس كملاذ آمن للفقراء فى اغلب الاوقات حتى مهما ارتفع سعرها فهى فى النهاية تشبع الكثيرين
• تأمل معى البطاطس المقلية (المحمرة) بكل انواعها صوابع ولا شيبسى هناك ايضا بعض ادوات الطبخ الحديثة تصنع اشكال العاب من البطاطس كى يحبها الاطفال ، وياسلام لما تسلق البطاطس الصغيرة وبعدين ترجع تقليها ،ربما لا يعرف الكثير قلية الجزء الخارج من البطاطس المحشية بعد عملية التقوير حيث يتم تحمير هذا الجزء وكل بقى يا معلم وادعيلى !
• ماذا عن البطاطس المسلوقة المهروسة كم نوع منها او حتى طريقة الخلط بزيت ولا بسمن ولا تعملها طرنشات وبعدين تعملها كده زى ما بيقولوا "نى فى نى " ولا تأكلها مع البقدونس ، او تأكلها وهى سليمة بشوية كمون!
• طيب البطاطس المسلوقة اللى بتتعمل مخلل فى اغلب المحلات سواء بالشطة او متبلة ، طب طرق محلات الوجبات السريعة وبخاصة البتيزا فى عمل البطاطس كسلطة وهى وجبتى المفضلة عن البتيزا ولذلك قضيت وقت طويل فى دراسة استراتيجية وضع اكبر كم من السلطة فى الطبق.
• طيب ايه رأيكم فى كفتة البطاطس ، طيب فى البطاطس المحشية باللحمة المفرومة وطريقة استخدام عادم التقوير كما شرحتها مسبقا فى الأعلى.
• هل اتحول بكم الى صينية البطاطس مع الفراخ او اللحم الغارقة فى الطماطم وحوافها العليا مقرمشة من شواية الفرن ، يا عم طلع بطاطس بقى سيب اللحمة والفراخ على رأى النكتة الدارجة ، ما رد فعلك لترنشات البطاطس المقطعة بجوار الاسماك او الفراخ فى صينية فى الفرن !
•  مارأيكم فى البطاطس المكعبات جنب كفتة الرز وصيدها من صلصة الطماطم ، طيب البطاطس كمكون رئيسى داخل المسقعة وذلك الطعم الممزوج بمكونات المسقعة وياسلام لو المسقعة دى بالبشاميل!
• ماذا عن البطاطس البورية ، او عجة البطاطس والبطاطس فى قلب الخضار السوتيه او كمكون من مكونات شوربة الخضار (رغم أن الواحد وهو صغير كان بيقول عليها اكل المرضى-العيانين- بس لما كبر بقى يقدرها ).
• هناك دول اخرى تصنع من البطاطس دقيق ومعجنات مختلفة واعتقد ان هناك تنويعات بطاطسية اخرى لكن تلك التنويعات العالقة بالذهن وان كنت تصورتم أنها تأملات جوعان او تخاريف الستة أيام بتوع شوال فاعترف على نفسك كم مرة هربت بطاطس وهى بتتقلى من المطبخ واكلتها بسخونتها بعيدا عن عين والدتك  قبل أن تلومنى فى عشق التنويعات البطاطسية جدا ، طيب  ازيدك من العشق عشقا خاص بى هو عشق المجموع الخضرى للبطاطس حيث قمت بزراعتها من قبل تستطيع ان تجربه مع اى بطاطسية مزرعة عندك فى البيت وأن كنت تلومنى فى عشق البطاطس فاسمع شعبان عبد الرحيم وهو يتغنى بالبطاطس ويقول "هحلقها بطاطس زى حسام علشان يقولوا كابتن شعبان".